Die Loofhuttefees

Elke jaar kom duisende Christene bymekaar op plekke regoor die wêreld om Jesus Christus se heerskappy oor die hele aarde waar te neem en te vier.

Spreek met die kinders van Israel en sê: “Die vyftiende dag van hierdie sewende maand sal die Loofhuttefees vir sewe dae vir die HERE wees.”

Leviticus 23:34

Vir baie is ‘Loofhuttefees’ ’n vreemd-klinkende frase, en roep dit ’n beeld op van iets onmoontlik ver en argaïes. Tog kyk die Loofhuttefees na die toekoms en skilder dit ’n tyd uit waarna die mensdom deur die eeue heen verlang het.

Uittreksel uit ‘God se Heilige Dag Plan’ (studiegids) —

Die betekenis van die Loofhuttefees

Die naam van die Loofhuttefees spruit voort uit God se opdrag aan antieke Israel om tydelike “hutte,” soms “skerms” genoem, te bou om in te woon tydens die fees. Die Israeliete het hul huise verlaat en tydelike woonplekke gebou (die Hebreeuse sukkah het ’n “hut van gevlegte takke” aangedui) om in te woon terwyl hulle voor God gejubel het. Dit het hulle herinner aan hul vrylating uit slawerny en hul verblyf in hutte toe God hulle uit Egipte gelei het (Levitikus 23:34, Levitikus 23:41-43). In skerp kontras met die swaarkry van slawerny, beklemtoon hierdie fees rus, vrede en voorspoed, aangesien dit voorsien in die behoeftes van alle mense, insluitend vreemdelinge, weduwees en die armes.

Die Bybel beklemtoon dat, soos met hutte of tydelike wonings, ons fisiese lewe verganklik is. Die geskrifte van die apostel Paulus weerspieël hierdie tema: “Want ons weet dat as ons aardse huis van hierdie tabernakel afgebreek word, ons ’n gebou van God het, ’n huis nie met hande gemaak nie, ewig in die hemele. Want hierin sug ons, terwyl ons vurig verlang om met ons woning uit die hemel beklee te word” (2 Korintiërs 5:1-2).

Die Loofhuttefees antisipeer die Messiaanse tydperk waarvan talle Ou Testamentiese profete gepraat het, en wat deur die Apostel Johannes (Openbaring 19:1 – 20:6) as 1000 jaar voorsien is, wanneer Jesus Christus teruggekeer het om die aarde as Koning van die konings te regeer, en ons moeë, oorloggeteisterde planeet begin genees. Alhoewel ons nie weet wanneer hierdie millennium sal begin nie, sal dit ’n tyd van groot vrede, oorvloed en vreugde wees. Die mensdom sal die weg van gee ervaar, in teenstelling met die samelewing se huidige filosofie van neem. Die millennium is die volgende groot stap in die nimmereindigende Koninkryk van God en Sy ewige heerskappy. Ons lees in die Bybel dat Jesus die Loofhuttefees tydens Sy aardse bediening (Johannes 7:1-14) byna tweeduisend jaar gelede waargeneem het. God het ook die profeet Sagaria geïnspireer om te skryf van ’n tyd wat nog moet kom, wanneer alle nasies van die aarde “die Koning, die HERE van die leërskare, sal aanbid, en…die Loofhuttefees sal hou” (Sagaria 14:16-19).

“Dit is My feeste”

Lank gelede het God Sy volk opdrag gegee om Sy Feeste noukeurig waar te neem.

“Spreek met die kinders van Israel en sê vir hulle: ‘Die feeste van die HERE, wat julle as heilige samekomste moet uitroep, dit is My feeste.’”

Leviticus 23:2

Let op dat Hy nie gesê het dit is hulle feeste nie. In gehoorsaamheid aan God se opdrag, kom lede van die United Church of God op baie plekke regoor die wêreld bymekaar om die Loofhuttefees waar te neem en ’n voorsmaak van ‘die Millennium’ te ervaar. Die feeste is Christelik van aard en betekenis, met God ons Vader en Jesus Christus in hul hart en kern. Om meer oor God se feeste te leer, klik op die studiegids-skakel hieronder of sien hierdie kategorie van ons aanlyn biblioteek.

God se Heilige Dagplan

Ons glo God bou ’n familie.
Hy wil hê dat die hele mensdom – insluitend u – deel van daardie familie moet wees.

Ons is daartoe verbind om ware Bybelse Christendom te herwin en te beoefen, en God se wonderlike plan met die wêreld te deel. Ons streef daarna om dieselfde leringe, leerstellings en onderrig as dié van die vroeë Kerk te volg.